ມອບຫຼຽນກາ 65 ປີຊາວໜຸ່ມ ພ້ອມມອບ-ຮັບໜ້າທີ່ຄະນະຊຸດໃໝ່

ພິທີມອບ​ຫຼຽນກາ 65 ປີ​ ແລະ​ ໃບຍ້ອງຍໍ​ ຂອງຊາວໜຸ່ມກົມພັດທະນາຊົນນະບົດ.

ໃນວັນທີ​ 19 ມັງກອນ​ 2026 ນີ້​ ຊາວໜຸ່ມຮາກຖານກົມພັດທະນາຊົນນ ແລະ​ ຫຼຸດຜ່ອນຄວາມທຸກຍາກ ໄດ້ຈັດພິທີມອບຫຼຽນກາ 65​ ປີ​, ໃບຍ້ອງຍໍ-ຊົມເຊີຍ​ ແລະ ພິທີມອບ-ຮັບໜ້າທີ ຄະນະບໍລິຫານງານຊາວໜຸ່ມຮາກຖານພັດທະນາຊົນນະບົດ ແລະ​ ຫຼຸດຜ່ອນຄວາມທຸກຍາກ ຂື້ນທີ່ຫ້ອງປະຊຸມຂອງກົມໂດຍການເປັນປະທານຂອງສະຫາຍ ປອ​ ດວງຕາວັນ ສີສົມບັດ​ ຄະນະບໍລິຫານຊາວໜຸ່ມປະຊາຊົນປະຕິວັດລາວ ເລຂາຊາວໜຸ່ມກະຊວງກະສິກຳ ແລະ​ ສິ່ງແວດລ້ອມ,​ ສະຫາຍ​ ອາໂນສັກ ແພງທີມມະວົງ ຄະນະພັກຮາກຖານ,​ ​ຮອງຫົວໜ້າກົມພັດທະນາຊົນນະບົດ ພ້ອມນີ້ບັນສະຫາຍເລຂາ,​ ຮອງເລຂາໜ່ວຍ,​ ສະມາຊິກຊາວໜຸ່ມ,​ ຕາງໜ້າ​ 3 ອົງການຈັດຕັ້ງເຂົ້າຮ່ວມຢ່າງພ້ອມພຽງ.

ໃນທີປະຊຸມ ສະຫາຍ ຈັນມີ ພົມມະລາດ ເລຂາຊາວໜຸ່ມກົມພັດທະນາຊົນນະບົດ ແລະ ຫຼຸດຜ່ອນຄວາມທຸກຍາກ ໄດ້ຂື້ນຜ່ານການຊີ້ນຳ-ນຳພາ ໄລຍະຜ່ານມາ ແລະ ທິດທາງແຜນການ ການຈັດຕັ້ງປະຕິບັດໜ້າທີ່ຂອງວຽກງານຊາວໜຸ່ມ ກໍ່ຄືວຽກງານວິຊາສະເພາະໃນໄລຍະຜ່ານມາ​ໄດ້ສະແດງໃຫ້ເຫັນວ່າການສ້າງຂະບວນການທີ່ພົ້ນເດັ່ນ ທີ່ພາກພູມໃຈເປັນຕົ້ນແມ່ນ ໄດ້ຕັ້ງໜ້າກໍ່ສ້າງຂະຫຍາຍ ສະມາຊິກຊາວໜຸ່ມໄປຕາມຂໍ້ແຂ່ງຂັນ 4 ບຸກຂອງຊາວໜຸ່ມ ທີ່ຕິດພັນກັບການສ້າງພັກປອດໃສ, ເຂັ້ມແຂງ, ໜັກແໜ້ນ ທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນວິທີນຳພາ ແລະ ສາມາດຍາດໄດ້ຜົນງານຫຼາຍຢ່າງທີ່ພົ້ນເດັ່ນ, ເຫັນໄດ້ບັນຫາ, ສາຍເຫດ, ຈຸດອ່ອນ ຂໍ້ຄົງຄ້າງທີ່ຈະໄດ້ເອົາໃຈໃສ່ແກ້ໄຂໃນຕໍ່ໜ້າ, ສາມາດຖອດຖອນບົດຮຽນໄດ້ ແລະ ມີຜົນສຳເລັດຕາມແຜນການ ແລະ ລະດັບຄາດໝາຍທີ່ກຳນົດໄວ້ໃນ 5 ປີຕໍ່ໜ້າ (2026-2030). ຍ້ອນມີການຊີ້ນໍາ-ນໍາພາ ຂອງ ຄະນະຊາວໜຸ່ມຮາກຖານກົມ ແລະ ຄວາມບຸກບືນສູ້ຊົນປະຕິບັດ ໜ້າທີ່ຂອງສະມາຊິກຊາວໜຸ່ມ ຕະຫຼອດຮອດສະມາຊິກຊາວ ໜຸ່ມອາວຸໂສ, ປະກອບສ່ວນອອກແຮງເພື່ອປະເທດຊາດ, ສຸມສະຕິປັນຍາ ເຂົ້າໃນວຽກງານທີ່ໄດ້ມອບໝາຍຈົນບັນລຸຜົນສໍາເລັດ ຕາມຄາດໝາຍ ແລະ ມີປະສິດທິຜົນ ຢ່າງຈົບງາມ.​ ເພື່ອເຮັດວຽກງານຂອງຊາວໜຸມຮາກຖານໄດ້ສືບຕໍ່, ສະນັ້ນ, ຄະນະບໍລິຫານຊາວໜຸ່ມກະຊວງກະສິກຳແລະ ສິ່ງແວດລ້ອມ ອອກມັດຕິ ບົງໂຕແຕ່ງຕັ້ງຄະນະບໍລິຫານງານຊາວໜຸ່ມຮາກຖານກົມພັດທະນາຊົນນະບົດ ແລະ ຫຼຸດຜ່ອນຄວາມທຸຍາກ ປະກອບມີ:

1. ສະຫາຍ ແກ້ວຕາເພັດ ບຸນທະວີຊີນ ເປັນເລຂາ

2. ສະຫາຍ ຄຳພູວົງ ຄຳແຫວນ ເປັນຮອງເລຂາ

3. ສະຫາຍ ສຸພະຈັນ ວັນນະສີ ເປັນຄະນະ

4. ສະຫາຍ ທອງສຸກ ທອງບັນດິດ ເປັນຄະນະ

5. ສະຫາຍ ນາງ ພອນນາລີ ນາມວົງ ເປັນຄະນະ

ບົງໂຕແຕ່ງຕັ້ງປະທານ, ຮອງປະທານກວດກາ ປະກອບມີ:

1. ສະຫາຍ ສຸພະຈັນ ວັນນະສີ ເປັນປະທານກວດກາ

2. ສະຫາຍ ພຸດທະນົງຮັກ ພົງສະຫວັດ ເປັນຮອງປະທານກວດ

ພ້ອມນີ້ກໍ່ໄດ້ຈັດພິທີມອບຫຽນກາ 65 ປີ ແລະ ໃບຍ້ອງຍໍ

ໃຫ້ກຽດມອບຫຼຽນກາ 65 ປີ ແລະ ໃບຍ້ອງຍໍໃນຄັ້ງນີ່ໂດຍສະຫາຍ ປອ ດວງຕາວັນ ສີສົມບັດ ຄະນະບໍລິຫານຊາວໜຸ່ມປະຊາຊົນປະຕິວັດລາວ ເລຂາຊາວໜຸ່ມກະຊວງກະສິກຳ ແລະ​ ສິ່ງແວດລ້ອມ ໃນຕອນທ້າຍຄະນະປະທານກໍ່ໄດ້ໃຫ້ກຽດໂອລົມ ແລະ ໃຫ້ທິດຊີ້ນຳ ໂດຍຮຽກຮ້ອງໃຫ້ຄະນະຊາວໜຸ່ມ ຊຸດໃໝ່ ອອກແຮງ ເຊື່ອມຊຶມແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ເສີມຂະຫຍາຍອັນດີ ເດັດດ່ຽວແກ້ໄຂ ຂໍ້ຄົງຄ້າງ ທີ່ເປັນອັນອຸດຕັນ ໃນໄລຍະຜ່ານມາ; ເປັນເຈົ້າການປະຕິບັດ ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ກົດລະບຽບຂອງຊາວໜຸ່ມປະຊາຊົນປະຕິວັດລາວ, ບັນດາມະຕິຕ່າງໆຂອງຂັ້ນເທິງ, ຫັນເປັນແຜນການ ແຜນງານ ໂຄງການລະອຽດ ພາຍຫຼັງສຳເລັດກອງປະຊຸມຄັ້ງນີ້ແລ້ວ ໃຫ້ຄະນະຊາວໜຸ່ມ ຊຸດໃໝ່ ຕ້ອງໄດ້ມີການແບ່ງໜ້າທີ່ຄວາມຮັບຜິດຊອບກັນ ໃຫ້ລະອຽດ ຈະແຈ້ງ ພ້ອມທັງສ້າງເປັນແຜນດຳເນີນງານ ແລະ ມອບໝາຍຄວາມຮັບຜິດຊອບ ບົນພື້ນຖານຄວາມເປັນເອກະພາບພາຍໃນໝູ່ຄະນະ ປະຕິບັດຫຼັກການລວມສູນ ປະຊາທິປະໄຕ ສືບຕໍ່ປະຕິບັດ ຂໍ້ແຂ່ງຂັນຊາວໜຸ່ມ 4 ບຸກ ແລະ ຂະບວນການຮັກຊາດ ແລະ ພັດທະນາ ໃຫ້ເອົາໃຈໃສ່ໃນການປະຕິບັດໜ້າທີ່ວິຊາສະເພາະເພື່ອຈັດຕັ້ງປະຕິບັດໜ້າທີ່ ຂອງຕົນຕາມພາລະບົດບາດ ໃຫ້ໄດ້ຮັບຜົນສໍາເລັດຕາມລະດັບຄາດໝາຍ.

ພາບ-ຂ່າວໂດຍ: ພອນໄຊ ສີສົງຄາມ

ເຜີຍແຜ່ໂດຍ: ພະແນກເຕັກໂນໂລຊີຂໍ້ມູນ-ຂ່າວສານ, ຫ້ອງການກະຊວງກະສິກຳ ແລະ ສິ່ງແວດລ້ອມ